CHIZEE!

This is the original draft of Sen. Francis Escudero’s speech delivered at Club Filipino last Wednesday morning. A copy was sent to The Professional Heckler by a reliable source who requested anonymity.

“Maraming salamat po sa lahat ng taong nandito lalung-lalo sa mga kababayan kong Bicolano sa walang pag-aatubiling pagtungo sa gusaling nasa latitude 14° 36′ 14″ Hilaga ng Equator at longitude 121° 2′ 56″ Silangan ng Prime Meridian sa Mapa ng Maynila, na mas kilala rin sa pangalang Club Filipino.

Nais ko pong ipabatid sa inyo na ako ay nagpaalam na at nag-resign na bilang miyembro ng Nationalist People’s Coalition o NPC, ang partidong itinatag ni Ginoong Eduardo ‘Danding’ Cojuangco ang ninong namin sa kasal ng aking asawang si Cristine, at founder ng NPC na aking kinaaniban sa nakalipas na labing-isang taon ng aking pagiging pulitiko sa Mataas na Kapulungan man ng Kongreso na kung tawagin natin ay Senado o sa Mababang Kapulungan ng Kongreso bilang kinatawan ng lalawigan ng Sorsogon na walang kahihiyang nanguna sa tangka ngunit bigong pagpapatalsik sa noo’y Chief Justice na si Hilario Davide katulong ang noo’y kongresista at paboritong pamangkin ni Ginoong Cojuangco na ngayo’y kalihim ng tanggulang pambansa na nag-aambisyon ding maging pangulo ng Pilipinas na si Gilbert “Gibo” Teodoro.

Sinuman pong nagpa-planong tumakbo bilang pangulo, dapat wala pong partidong kinabibilangan, NPC, LP NP, Lakas, Kampi, LAMMPP, PDP-Laban, Magdiwang, Magdalo, Bayan Muna, Akbayan, Migrante, Anakpawis, Sanlakas, Lapiang Manggagawa, Alyansa ng mga Sabungero, Ang Ladlad, 1-UTAK, SMILE, SAMASA, ISA, STAND-UP, KAISA, ALYANSA, (FYI: Mga political parties ‘yan sa UP), Sigue-Sigue, OXO, Sputnik, Ativan Gang, o ano pa man.

Ang dapat na partidong kinabibilangan ng sinumang nagpa-planong tumakbo, dapat po Pilipinas. At lahat ng mga ka-partido niya dapat lahat din Pilipino. Bata man o matanda, babae o lalake, mayaman o mahirap, nakapag-aral o hindi, dilaw man o pula ang kulay, binoto ka man o hindi, maka-Dos man o Maka-Siyete, Globe man o Smart o Sun kapag nagtitipid, tuli man o supot, bakla man o lesbiyana, out man o discreet, bisexual man o straight-tripper, top man o bottom, lights off o lights on, dapat ituring mo ng pantay o pareho dahil kung hindi, baka magkaroon ng kaguluhan sa Pilipinas na mas lalong magpapahirap sa milyun-milyon nating kababayan at ‘yun ang hinding-hindi ko kayang tanggapin bilang lingkod-bayan na nagnanais ng bagong pagbabago sa ating bansa na matatagpuan sa Timog Silangang Asya at nasa tinatawag na Pacific Ring of Fire kung saan madalas magkaroon ng lindol na hindi naman kayang ipredict kahit ng Philippine Institute of Volcanology and Seismology na dating pinamumunuan ng namayapang si Raymundo Punongbayan.

Nagbitiw po ako dahil sa tatlong kadahilanan na iisa-isahin ko kung inyong mamarapatin ngunit kung hindi naman ay iisa-isahin ko pa rin dahil sayang naman ang pagkakataong tayo ay nagkakatipun-tipon sa gusaling ito na nasa latitude 14° 36′ 14″ Hilaga ng Equator at longitude 121° 2′ 56″ Silangan ng Prime Meridian sa Mapa ng Maynila. Ang tatlo pong dahilan ng aking pagbibitiw ay ang sumusunod. Una, hindi ako heredero katulad ni Gilbert Teodoro; pangalawa, hindi ako haciendero katulad ni Noynoy Aquino, at pangatlo, lalo pong hindi ako bilyonaryo katulad ni Manny Villar.

Ngunit ito po ang dapat na unawain n’yo: hindi po salapi o pondo ang dahilan ng pagbibitiw ko sa partido at lalong hindi dahil sa napabalitang alitan namin ni Ginoong Eduardo Cojuangco bagamat gusto kong bigyang diin na hindi ako heredero katulad ni Gilbert Teodoro; hindi ako haciendero katulad ni Noynoy Aquino, at lalo pong hindi ako bilyonaryo katulad ni Manny Villar na malayang makakagastos sa halalang matagal ko na ring pinapagplanuhan subalit hindi ko pa lubusang napagpapasyahan kaya’t ito po ang gusto kong iparating sa lahat: hindi po kakulangan sa pera ang dahilan ng aking pag-atras datapwat kung mabibigyan ako ng pagkakataon ay gusto ko ring maranasan ang maging heredero katulad ni Gilbert Teodoro; maging haciendero katulad ni Noynoy Aquino, at lalo na po ang maging bilyonaryo katulad ni Manny Villar.

Hayaan po ninyong pag-isipan ko ang aking mga susunod na hakbang dahil kailangang kunsultahin ko, hindi lamang ang aking pamilya o kaibigan, kundi maging kayong lahat na kapartido ko na ngayon lalo pa’t ako’y malaya nang makapagpapasya kung ano ang nararapat at makakabuti sa lahat ng tao sa Pilipinas na ninanais ko ring umunlad ang buhay at umangat ang estado sa lipunan katulad ni Gilbert Teodoro na isang heredero; ni Noynoy Aquino na isang haciendero at, lalo na po ni Manny Villar na isang bilyonaryo.

Sa huli, isa lamang po ang hinihiling ko sa lahat: huwag ninyong paniwalaan ang walang basehang alegasyon na salat ako sa pondo kaya ako nagpasyang iwan ang partidong hindi maiwan-iwan ngayon ni Loren Legarda dahil sa pangambang baka ang aking pagbibitiw ay maging mitsa ng katapusan ng kanyang karera sa pulitika. Mali po ‘yon. Hindi po salapi o kontribusyon mula sa mayayamang negosyante ang nagbunsod sa aking pagbibitiw sa NPC bagamat aaminin kong hindi po ako heredero, hindi po ako haciendero at lalo pong hindi ako bilyonaryo.

Maraming salamat po sa inyong lahat at mabuhay ang sambayanang Pilipino lalo na ang maliliit na taong tapat na naglilingkod sa mga heredero, haciendero at bilyonaryo.”

[Please turn to page 2 for continuation of speech...]

_________
“A good retreat is better than a bad stand.”
~Irish Saying